Jalol Qurbonov iqtisodiyot va moliya vaziri o‘rinbosari etib tayinlandi

O‘zbekiston prezidentining qarori bilan Jalol Jabborovich Qurbonov O‘zbekiston Iqtisodiyot va moliya vazirligida komplayens va korrupsiyaga qarshi ichki nazorat bo‘yicha vazir o‘rinbosari lavozimiga tayinlandi.

Qarorga ko‘ra, yangi lavozimda u vazirlik tizimida komplayens talablariga rioya etilishi, ichki nazorat mexanizmlarini takomillashtirish, korrupsiya xavf-xatarlarini barvaqt aniqlash va oldini olishga qaratilgan ishlar samaradorligini kuchaytirish yo‘nalishlari bo‘yicha faoliyat olib borishi ko‘zda tutiladi. 

Shuningdek, sohada shaffoflikni oshirish, manfaatlar to‘qnashuvining oldini olish, xizmat tekshiruvlari va profilaktik chora-tadbirlar tizimini muvofiqlashtirish kabi vazifalar ham mazkur yo‘nalishning muhim qismi hisoblanadi.

Tayinlov munosabati bilan Jalol Jabborovich Qurbonov O‘zbekiston prezidenti administratsiyasi kanselyariyasi mudiri lavozimidan ozod etildi.