Davlat xaridlarida elektron-skoring tizimi joriy etiladi

Yangi tizim orqali davlat xaridlarida ishtirok etuvchi sub’yektlarga “yuqori”, “o‘rta”, “past” va “eng past” ishonchlilik darajalari beriladi. Baholash jarayoni elektron-skoring orqali avtomatik amalga oshirilib, ishtirokchilarning ishonchlilik ko‘rsatkichiga qarab rag‘batlantirish va cheklov choralari qo‘llanadi.

Elektron-skoring natijalariga asosan quyidagi rag‘batlantirish choralari nazarda tutilgan:

“yuqori” ishonchlilik darajasiga ega ishtirokchilardan zakalat to‘lash talab etilmaydi;
eng yaxshi takliflarni tanlash va tender savdolarida ishtirokchilar takliflariga ishonchlilik darajasiga mutanosib ravishda qo‘shimcha ball beriladi;
“eng faol tadbirkor” tanlovida davlat xaridlarida ishonchlilik darajasi “yuqori” bo‘lgan ishtirokchilar nomzodlari qo‘llab-quvvatlanadi.

Shu bilan birga, ishonchlilik darajasi “past” va “eng past” bo‘lgan ishtirokchilar uchun ham alohida tartiblar belgilanadi. Xususan, ularning xarid qilish tartib-taomillarida ishtirok etishiga ruxsat etiladigan davlat xaridlarining eng yuqori qiymatiga nisbatan me’yorlar o‘rnatiladi. Shuningdek, bepul onlayn o‘quv kurslari orqali malakasini oshirish amaliyoti yo‘lga qo‘yiladi.