Давлат харидларида электрон-скоринг тизими жорий этилади

Янги тизим орқали давлат харидларида иштирок этувчи субъектларга “юқори”, “ўрта”, “паст” ва “энг паст” ишончлилик даражалари берилади. Баҳолаш жараёни электрон-скоринг орқали автоматик амалга оширилиб, иштирокчиларнинг ишончлилик кўрсаткичига қараб рағбатлантириш ва чеклов чоралари қўлланади.

Электрон-скоринг натижаларига асосан қуйидаги рағбатлантириш чоралари назарда тутилган:

“юқори” ишончлилик даражасига эга иштирокчилардан закалат тўлаш талаб этилмайди;
энг яхши таклифларни танлаш ва тендер савдоларида иштирокчилар таклифларига ишончлилик даражасига мутаносиб равишда қўшимча балл берилади;
“энг фаол тадбиркор” танловида давлат харидларида ишончлилик даражаси “юқори” бўлган иштирокчилар номзодлари қўллаб-қувватланади.

Шу билан бирга, ишончлилик даражаси “паст” ва “энг паст” бўлган иштирокчилар учун ҳам алоҳида тартиблар белгиланади. Хусусан, уларнинг харид қилиш тартиб-таомилларида иштирок этишига рухсат этиладиган давлат харидларининг энг юқори қийматига нисбатан меъёрлар ўрнатилади. Шунингдек, бепул онлайн ўқув курслари орқали малакасини ошириш амалиёти йўлга қўйилади.