O‘zbekiston-Qirg‘iziston chegarasida yangi post ochildi

«So‘g‘ment» chegara posti Qirg‘iziston va O‘zbekiston o‘rtasidagi chegara xavfsizligini ta’minlash hamda ikki davlat munosabatlarining yangi bosqichga ko‘tarilishi nuqtai nazaridan juda muhim ahamiyatga ega hisoblanadi.

Foto: 24.kg

Qirg‘izistonning Botken shahrida O‘zbekiston bilan chegaradosh hududda yangi post ochildi, deya xabar berdi 24.kg nashri.

Ta’kidlanishicha, «So‘g‘ment» chegara postining ochilishi davlat xavfsizligini mustahkamlash va chegaraoldi hududlarda barqarorlikni ta’minlashda muhim voqea hisoblanadi.

«Yangi «So‘g‘ment» chegara postida xizmatni sifatli olib borish uchun barcha sharoitlar yaratilgan. Zamonaviy talablarga javob beradigan kazarma qurilib, xizmat o‘tash uchun zarur shart-sharoitlar yaratilgan. Ta’kidlash joizki, ushbu hududda chegarachilar qirg‘iz-o‘zbek davlat chegarasining 12 kilometrdan ortiq qismini qo‘riqlaydi», deyiladi xabarda.

Avvalroq, 18 iyundan «Farg‘ona» chegara bojxona posti hamda Shohimardon qishlog‘iga o‘tishdagi «Oq qiya» bojxona punkti va «So‘x» chegara bojxona postining «Chashma» bojxona punkti 24 soatlik ish rejimiga o‘tayotgani xabar qilingandi.