Shohimardon va So‘xga borishdagi postlar 24 soatlik ish tartibiga o‘tmoqda

18 iyundan «Farg‘ona» chegara bojxona posti hamda Shohimardon qishlog‘iga o‘tishdagi «Oq qiya» bojxona punkti va «So‘x» chegara bojxona postining «Chashma» bojxona punkti 24 soatlik ish rejimiga o‘tmoqda, deya xabar berdi Bojxona qo‘mitasi.

Farg‘ona viloyati hokimligi xabariga ko‘ra, ular qatoriga «Vodil-Qadamjoy» nazorat-o‘tkazish maskani ham qo‘shiladi.

«Ushbu chora-tadbirlar Farg‘ona tumanidagi Shohimardon qishlog‘i hamda So‘x tumaniga borishda fuqarolar uchun yanada qulay shart-sharoitlar yaratish, fuqarolarning harakatlanishini yanada erkin va qulay qilish, postlarda yuzaga keladigan tirbandliklarning oldini olish maqsadida joriy etilmoqda», — deyiladi hokimlik xabarda.

Ma’lumot uchun, So‘x va Shohimardon O‘zbekiston uchun anklav hududlari bo‘lib, ular Qirg‘iziston ichkarisida joylashgan.

2024 yil Shohimardonga kirishdagi «Farg‘ona» va «Oq-qiya» chegara bojxona postlari 24 soatlik ish rejimiga o‘tkazilgandi. Bu O‘zbekiston va Qirg‘iziston prezidentlarining Toshkent shahridagi uchrashuvida erishilgan kelishuvlar doirasida amalga oshgan.