ОАВ: Emirates Женнифер Энистон тушган рекламани ҳимоя қилмоқда

Emirates авиакомпанияси актриса Женнифер Энистон тушган снобистик рекламани ҳимоя қилмоқда. Бу ҳақда Fox News нашри ёзмоқда.

Ролик 1 октябрь куни оммалаштирилди. 1 куни ичида у Facebook’да 1 млн марта, YouTube’да 540 минг марта кўрилди.

Сюжетга кўра, Энистон қўрқинчли туш кўради, унга “оддий” самолётда тегишлича люкс хизмат кўрсатилмайди. Шунда у Emirates лайнерида уйғониб кетади ҳамда люкс сервисга эга бўлади.
Кўпларга бу ролик “элитар” ҳаётни тарғиб қилгани боис маъқул тушмади. Шунингдек, у “тарихдаги энг снобистик реклама” деб топилди, чунки унда кўпчиликнинг қурби етмайдиган сервис мақталган.

Ўз навбатида, авиакомпания реклама кўпчилик томонидан ижобий қабул қилинганини таъкидламоқда. Компания президентининг катта ўринбосари Бутрос Бутрос рекламанинг юмористик моҳиятга эга эканлиги ва бунга Энистоннинг жуда яхши мос келганлигини таъкидлади.

“Унинг профессионаллиги ва комедияга усталиги суратга олиш майдонини ёриштириб юборди, биз натижадан жуда мамнунмиз”, - таъкидлади у.