Йўлбарс Амур ва эчки ҳаётини трансляция қилаётган сайт ташрифчиларнинг кўплиги туфайли блокланиб қолди

Приморье сафари боғида "дўстлашган" йўлбарс Амур ва эчки Тимурнинг кундалик ҳаётини кечаю-кундуз онлайн тартибда кузатиш имконияти пайдо қилинган сайт биринчи кунданоқ ҳаддан ташқари кўп ташриф кузатилиши туфайли босимни кўтара олмасдан ишламай қолди.

"Фойдаланувчилардан узр сўраймиз. Сайтимизга кўп миқдордаги ташриф кузатилиши туфайли сайт ҳостингида сервер билан боғлиқ муаммолар пайдо бўлиб, сайт блок бўлиб қолди. Айни вақтда бу техник носозликни тузатиш устида иш олиб борилмоқда", дейилади сайтнинг ижтимоий тармоқдаги саҳифасида.

Бугун, 30 декабрь куни тонгида боғда ўрнатилган тўртта видеокамера тасвирини боғнинг расмий сайтига тўғридан-тўғри, жонли равишда узатиб бориш йўлга қўйилганди.

Эслатиб ўтамиз, Россия президенти Владимир Путин маъмуриятига йўналтирилган петицияда йўлбарс Амур ва эчки Тимурнинг дўстлик ҳикоясини кадрларга муҳрлаш таклиф қилинган эди.