2015 йилда Суриядаги уруш оқибатида 55 мингдан кўпроқ одам ҳалок бўлган

Суриянинг инсон ҳуқуқлари бўйича кузатув пункти 2015 йилда Сурияда уруш оқибатида 55219 нафар одам, хусусан 13429 нафар тинч аҳоли вакили ва 2574 бола ҳалок бўлганини маълум қилди, деб хабар бермоқда AFP ахборот агентлиги.

Ҳуқуқ ҳимоячиларининг маълумотларига кўра, аввалги йиллар каби 2015 йилда ҳалок бўлганларнинг катта қисмини жангларда иштирок этганлар, жумладан 7798 нафар исёнчи ва 16 мингдан кўпроқ ИШИД жангариси ташкил қилган. Сурия ҳукумат қўшинлари томонида жанг қилган 1214 нафар ҳорижий жангари ҳалок бўлган. Шунингдек, шахси ҳали аниқланмаган яна 274 киши ҳалок бўлгани маълум қилинди.

2014 йилда эса 76021 одам ҳалок бўлган. Суриядаги ихтилоф бошидан бери мамлакатда 260,758 одам ҳалок бўлган, улардан 76 мингдан кўпроғи тинч аҳоли вакили бўлган. Умумий миқдорда 45 минг исёнчи ва 95 мингдан кўпроқ жанг иштирокчиси ҳалок бўлган.
Яна 40121 нафар жангари АҚШ бошчилигидаги коалиция ва Россия ҳарбий самолётлари томонидан йўқ қилинган.