Шимолий Корея етакчиси Янги йилнинг биринчи куни бобоси ва отаси – Ким Ир Сен ва Ким Чен Ирнинг хотираларини ёд этди

Шимолий Корея етакчиси Ким Чен Ин мамлакатнинг партия ва ҳарбий арбобларининг катта гуруҳи ҳамроҳлигида 2016 йил 1 январда унинг бобоси ва отаси – Ким Ир Сен ва Ким Чен Ирнинг жасадлари жойлашган тобутлар сақланадиган Кимсусан саройига ташриф буюрди ва уларнинг хотирасини Янги йил муносабати билан ёд этди. Бу ҳақда Корея марказий телеграф агентилиги маълум қилди.

Шундан кейин Ким Чен Ин миллатга йўлланган янги йил мурожаатида мамлакат сиёсий йўналишининг асосий жиҳатларини баён этди. У Жанубий Корея билан муносабатларнинг яхшиланиши тарафдори эканлигини айтди. Унинг айтишича, Шимолий Корея “тинчлик ва ватаннинг бирлашиши тарафдорлари билан музокаралар учун очиқ”. Ким Чен Ин шунингдек, Сеулдан Шимолий ва Жанубий Корея ўртасида Корея яриморолида кескинликни камайтириш мақсадида 2015 йилнинг августида эришилган келишувни ҳурмат қилишга чақирди. Унинг фикрича, Сеул “икки томон ўртасида ярашув жараёнини барбод қила олувчи ҳаракатлардан воз кечиши керак”.

Ким Чен Ин ўз нутқида Шимолий Кореянинг ядровий дастури ҳақида эслатиб ўтди ва Пхеньян “ташқи душман кучлар томонидан юзага келтириладиган урушга тайёрлигини” айтди.