Хорижий таҳлилчилар Владимир Путинни 2016 йилги асосий хавфлар қаторига киритишди

2016 йилги бизнес учун йирик хавфлар орасида АҚШ ва Хитой ташқи сиёсатининг қатъийлаштирилиши, террорчилик таҳдидлари, нефть нархининг 20 доллардан пастроққа камайиши, киберҳужумлар ва Кремлнинг кутилмаган ҳаракатлари айтилди. Бу ҳақда Forbes журналида ёзилди.

Нашрнинг ёзишича, сиёсий хатарлар бизнес учун олдиндан айтиб бўлмайдиган хавфлардир. 2016 йилда бизнесни қандай хатар кутаётганини аниқлаш мақсадида мақола муаллифи Жонатан Вебб кўплаб таҳлилчиларнинг фикрини ўрганиб, улар асосида 2016 йилдаги 9 та энг муҳим сиёсий хавфлар рўйхатини тузиб чиқди.

Бундай хавфлар орасида Лотин Америкасининг иқтисодий қийинчиликлар босими остида ўнг кучлар томон юзланиши ҳамда Африка дуч келиши мумкин бўлган узоқ давом этувчи иқтисодий барқарорсизлик айтилди.

Таҳлилчиларнинг фикрича, Обаманинг юмшоқ ёндашишидан кейин президент лавозимига номзодлар қатъийроқ ташқи сиёсатни талаб қилдилар. Хитой ва Россия Обама ҳарбий ҳаракатларни тарафдори эмаслигини кўрдилар ва бундан фойдаландилар, деб ёзмоқда нашр.

Экспертлардан бирининг фикрича, бу давлатлар Обаманинг президентлик муддатининг якунланишигача янада каттароқ глобал барқарорсизликни келтириб чиқаришлари мумкин.

Хитой ишбилармонлик муҳитига хавф солувчи яна бир таҳдид сифатида айтилмоқда. Хитой ўзининг ишончи баланд ҳарбий ва ташқи сиёсати билан мамлакатда ғарб компанияларига савдо операцияларни амалга оширишда қийинчилик туғдириши мумкин.

Нашрнинг ёзишича, Россия ўзини 2016 йилда қандай тутиши борасида экспертларнинг фикри турлича бўлди. Улар Россия ва Ғарб ўртасидаги кескинликнинг пасайишини прогноз қилишмоқда, бу қисман Суриядаги умумий манфаатлар билан боғлиқ бўлади.

АҚШ Россия охир-оқибат Башар Асадни кетишга кўндиради, чунки Путинга ИШИДни ютиш учун АҚШнинг ҳарбий қудрати керак, деб айтмоқда таҳлилчилардан бири.

Бироқ шу билан бирга экспертлар “Украинага бостириб кирган” Россияни барқарорсизлик ва ишончсизликнинг доимий манбаси бўлади, деб ҳисобламоқдалар. Уларнинг айтишича, “Путин ўзини жуда ғалати тутмоқда” ва “унинг хатти-ҳаракатларини олдиндан айтишнинг иложи йўқ”.

Бу ғоя тарафдорлари Путин кўп таваккалчилик қилаётгани ва бу таваккаллар назоратдан чиқиши, натижада Россия қувғинди давлатга айланиши мумкин, демоқдалар. Путин кескинроқ ҳаракат қилмоқда, бу эса у томондан турли мавҳум ва ғалати ҳаракатлар амалга оширилишига олиб келиши мумкин.

Бизнес учун хатарлар орасида нефть нархининг 20 доллардан пастлаб кетиши, терактлар ва ИШИД ҳаракатларининг кутилмаган оқибатлари, ишбилармонлик операциялари ўтказиладиган компьютер серверларига киберҳужумлар ҳам айтилди.

Нашр муаллифи 2016 йилдаги хавфлар орасида 1-ўринга ядровий террорчиликни қўйди. Агар ИШИД каби террорчилик гуруҳи ядровий қурилмани қўлга кирита олса, бу бутун дунёда сезиларли ўзгаришларга олиб келиши мумкин.

Таҳлилчиларнинг фикрича, ИШИД оммавий қирғин қуролини “садоқатсиз” покистонлик ёки россиялик генералдан 10 ёки 20 млн долларга сотиб олиши мумкин. Нашрнинг таъкидлашича, бунинг юз бериши эҳтимоли кам, бироқ юз берса ҳам оқибатлари улкан бўлади.