АҚШ компанияси Наманган вилоятидаги “Норинтекс” тўқимачилик мажмуаси акцияларини сотиб олмоқчи

АҚШнинг Enertrade компанияси Наманган вилоятидаги “Норинтекс” тўқимачилик мажмуаси акцияларининг давлатга тегишли пакетини сотиб олишни режалаштирмоқда, деб маълум қилди “Ўзбекенгилсаноат”даги манба Sputnik нашри мухбирига.

Манбанинг маълум қилишича, америкаликлар “Ўзбекенгилсаноат”га тегишли корхонанинг 25 фоиз акциясини сотиб олиш бўйича ҳамфикрлик ҳақидаги меморандумни имзолади.

“Ҳозир “Ўзбекенгилсаноат”, Давлат рақобат қўмитаси ва АҚШ томони билан шартномани тайёрлаш жараёни кетмоқда. Биз барча техник жараёнларни якунлаб, шартномани 2016 йилнинг 1-чораги якунигача имзолашни режалаштирмоқдамиз”, деб айтди манба.

Дастлабки келишувларга кўра, АҚШ компаниясига тўловни амалга оширишнинг бир неча варианти таклиф қилинди. Мисол учун, компания зарур маблағни бирданига ёки уни 4 бўлакка бўлиб, 2016 йил давомида тўлаши мумкин.

Манбанинг маълум қилишича, америкаликлар корхонани тақдим этиладиган замонавий технологик ечимлар ва технологиялар ҳисобига кенгайтириш мажбуриятини ўз зиммаларига олдилар.

Корхона 1984 йилда бунёд этилган, 1995 йилда эса хусусийлаштирилган. Корхонанинг устав жамғармаси 640 млн сўмни ташкил қилади. 2014 йил якунларига кўра, корхонанинг соф тушуми 3,7 млрд сўмдан кўпроқни ташкил қилган.