Эрон 5 йил ичида биринчи марта Европадан нефть маҳсулоти учун пул олди

Европаликларга Эроннинг нефть-кимё саноати маҳсулотларини харид қилишни тақиқловчи санкциялар амал қилиши тўхтади, деб хабар бермоқда Эроннинг IRNA агентлиги. Агентлик берган маълумотларга кўра, охирги беш йил ичида эронлик нефть-кимёчилар ўз маҳсулоти учун Европа Иттифоқида рўйхатдан ўтган банк орқали пул олишди.

Бир неча йил давомида амал қилган эмбарго Эрондан Европа Иттифоқига нефть-кимё маҳсулотларини етказишнинг тўхташига олиб келган. Эндиликда бу чекловлар бекор қилинди.

IRNA агентлигига Нефть-кимё савдо компаниясининг бошқарувчи директори Махди Шариф Никнафснинг маълум қилишича, унинг компанияси Испаниядаги банкларнинг биридаги ҳисоб рақамига биринчи тўловни олди. Унинг айтишича, пулларнинг ҳисоб рақамига тушиши 5 йил давом этган баҳснинг якунланганини билдирди.