Полиция Дубайдаги ёнғин туфайли 1 киши ҳалок бўлгани ҳақидаги хабарни рад қилди

Дубай полицияси 31 декабрь оқшомида шаҳар марказида жойлашган 5 юлдузли Address Downtown меҳмонхонасида юз берган ёнғин туфайли 1 киши ҳалок бўлгани ҳақидаги хабарни тасдиқламади. Айни вақтда ёнғин вақтида жабрланган 14 кишидан 2 нафари шифохонада қолаётгани айтилган.

Бундан олдинроқ, нашрларда ёнғин вақтида бир киши юрак хуружи туфайли ҳалок бўлгани ҳақида хабар тарқатганди. Бу маълумот расман тасдиқланмаганди.

Дубай полициячилари раҳбари Хамис Матар аль-Мазейна берган маълумотга кўра, ёнғиндан кейинги эвакуация ишлари вақтида 14 киши шифохонага олиб борилган, улардан бири ўрта даражадаги куйиш жароҳатини олган, яна бир киши юрак хуружига учраган.

"Барча жабрланувчилар шифохонага олиб борилган, зарур тиббий ёрдамлар кўрсатилганидан сўнг, улардан 12 нафарига жавоб берилган. Ҳозирда бир ҳомиладор аёл ва яна бир кекса эркак шифокорлар назоратида бўлиб турибди", дейди полициячилар бошлиғи.

Маълум қилинишича, ёнғин арафасида мингга яқин кишилар бўлган (шулардан 77 нафари болалар). Уларнинг барчаси хавфсиз жойга кўчирилган, Дубай ҳукумати уларга шаҳардаги бошқа меҳмонхоналардан жой тақдим этган.

Ёнғин сабабларини ўрганиш ишлари олиб борилмоқда.

Дубай марказидаги меҳмонхона биносида ёнғин чиқди

ТВ: Дубайдаги байрам тадбирлари меҳмонхонадаги ёнғин туфайли бекор қилинмайди

Дубайда меҳмонхонадаги ёнғинга қарамасдан байрам салютлари отилди

Дубайдаги меҳмонхонадаги ёнғин бинонинг 40та қаватига зарар келтирди