Амстердам-Пекин рейси йўловчиси иккинчи учувчини жароҳатлади

KLM авиакомпаниясининг Амстердамдан Пекинга амалга оширилаётган узоқ масофалик рейси йўловчиси самолётнинг иккинчи учувчисига тан жароҳатини етказди, дея хабар бермоқда Франс Пресс агентлиги компания баёнотига асосланган ҳолда.

Ҳодиса якшанба, 3 январь куни содир бўлган, бироқ орадан икки кун ўтибгина оммага ошкор қилинди.

“Якшанба, 3 январь куни Пекинда KL897 рейси бортида ўзини идора қила олмайдиган йўловчи ҳожатхонага қамалиб олиб, ўзига оз миқдорда тан жароҳатини етказган... Шундан сўнг у самолёт салонидаги ошхоналардан бирида иккинчи учувчини ҳам жароҳатлади”, - дея иқтибос келтирди агентлик.

Ҳодиса гувоҳларининг сўзларига кўра, йўловчи ўткир қурол – пичоқ ёки синган стакан бўлаги билан жароҳат етказган. Авиаташувчи мазкур хабарни тасдиқламади.

Авиакомпания хабарига кўра, жароҳат олган учувчи Пекинда даволанганидан сўнг Нидерландияга қайтиб кетган.