Ўзбекистонда БЕЛАЗларни таъмирлаш бўйича сервис маркази очилади

2016 йилда Ўзбекистонда БЕЛАЗ русумли машиналарга хизмат кўрсатиш маркази очилади. Бу ҳақда Беларусь автозаводининг вакилларига таянган ҳолда Sputnik агентлиги хабар бермоқда.

Агентлик суҳбатдоши берган маълумотларга қараганда, сервис маркази БЕЛАЗнинг Ўзбекистондаги расмий дилери “Дизель Комплект” томонидан 2015 йил ёзида Тошкентда рўйхатга олинган. Уни ташкил этиш учун компания Беларусь заводидан махсус сертификат олган.

Айни пайтда эҳтиёт қисмлари етказиб бериш ва мобил бригадалар яратиш босқичи кетмоқда. Айтилишича, мобил бригадалар жойларга чиқиб, тоғ-кон техникасига хизмат кўрсатади.

“Ўзбекистонда бизнинг ағдарма машиналаримиз қўлланади, аммо уларда, албатта, эксплуатация муддати ва алоҳида қисмларнинг ишдан чиқиш мухлатлари бор.

Энди янги сервис маркази бу ерда кенг миқёсли таъмирлаш ишларини ўтказиш имкониятини беради, бу бир томондан эксплуатация муддатларини оширса, иккинчи томондан мижозларга хизмат кўрсатиш сифатини орттиради”, - деди машинасозлик холдинги вакили.

Айтилишича, Ўзбекистон йилига ўртача 30 дона турли модификациядаги БЕЛАЗ харид қилади. Энг кўп миқдордаги етказмалар 2012 йилда амалга оширилган эди – жами 90 тоғ-кон техника бирлиги. Асосан 55-130 тонна юк кўтарувчи ағдарма машиналар ўзбекистонлик харидорларни қизиқтиради.