Араб давлатлари лигаси Эрондан араб давлатларининг ишларига аралашишни тўхтатишни талаб қилди

Эрон араб давлатларининг ички ишларига аралашишни бас қилиши лозим. Бу ҳақда Араб давлатлари лигаси бош котиби Набил ал-Арабий баёнот берди.

“Халқаро муносабатларда турли келишувлар билан мустаҳкамланган давлатларнинг ички ишларига аралашмаслик принципи мавжуд, Эрон бу принципни очиқ-ойдин бузмоқда, у бундай ҳаракатларини тўхтатмоғи лозим”, - деди у Лиганинг ўтган йилги фаолияти якунларига бағишланган катта матбуот анжумани чоғида.

Мазкур баёнот Саудия Арабистони ва Эрон муносабатларининг ёмонлашуви, Риёд ва унинг иттифоқчилари Теҳрон билан дипломатик алоқаларни узгани муносабати билан берилди.