Дизайнер Хенрик Фискер Aston Martin‘дан шантаж учун 100 млн доллар товон пули талаб қилмоқда

Таниқли автомобиль дизайнери Хенрик Фискер Aston Martin компаниясини шантаж қилишда айблаб, 100 млн доллар товон пули талаб қилиб унинг устидан судга мурожаат қилди. Бу ҳақда Business Insider нашри маълум қилди. 

Бунга инглиз брендининг Фискерга Детройтда бўлиб ўтадиган мотор-шоуда ўзининг Force 1 суперкарини намойиш қилиши тақиқлаган мактуби сабаб бўлган. Aston Martin шунингдек дизайнердан унинг машинасининг ташқи қиёфаси “Агент 007: Спектр” фильмидаги DB10 моделига ўхшаш бўлмаслиги учун ўзгартириш киритиши ҳақида ёзма кафолатлар талаб қилган, акс ҳолда инглизлар судга мурожаат қилиш билан таҳдид қилишган.

Fisker’нинг 745 от кучига эга янги суперкарининг хомаки суратлари интернетда бир ой аввал пайдо бўлган. Кўпчилик журналистлар унинг Aston Martin DB10 автомобили билан ўхшашлигини қайд қилишган. Компания вакиллари Фискерга ёзган мактубларида айнан шу ҳолатга эътиборни қаратишган. Aston Martin’да 2001-2004 йиллар ишлаган Фискер компанияда ишлаган вақтида бир нечта моделлар дизайни, жумладан V8 Vantage ва DB9 моделларининг дизайнини яратган.