ОАВ: Twitter 140та белгидан иборат чекловдан воз кечиб, 10 мингта белгидан фойдаланиш имконини жорий этишни режалаштирмоқда

Twitter ижтимоий тармоғи дастурчилари интернет фойдаланувчиларига ижтимоий тармоқда узун хабарлар чоп этиш имконини тақдим этмоқчи. Re/code нашрининг компанияга яқин бир неча манбаларига асосланиб хабар беришича, бу режа амалга оширилганидан кейин 140талик чеклов бекор қилинади ва твитларни 10 мингтагача белгидан иборат ҳолда ёзиш мумкин бўлади.

Маълум қилинишича, бу лойиҳа 2016 йилнинг биринчи чорагидаёқ ҳаётга тадбиқ этилиши кутилмоқда.

Манбанинг айтишича, Twitter компаниясидагиларнинг ўзи бу борада аниқ кунни белгилаб олмаган.

Қайд этиш керакки, Twitter август ойида шахсий хабарлардаги белгилар чекловини бекор қилган эди ва фойдаланиш мумкин бўлган белгилар сонини 10 мингтага оширганди.

Бу хабарга компаниянинг Сан-Францискодаги бош офисида муносабат билдирилмаган.