Олмалиқ тоғ-металлургия комбинати жаҳон молиявий-иқтисодий инқирозининг оқибатларини ўзида ҳис қилмоқда

“Олмалиқ тоғ-металлургия комбинати” АЖ бош директори Александр Фарманов 2015 йилда комбинатнинг фаолиятига жаҳон молиявий-иқтисодий инқирози кучли таъсир қилганини маълум қилди, деб ёзмоқда Олмалиқ кон металлургия комбинатининг расмий сайти.

“Бу инқирознинг оқибатларини нафақат бизнинг комбинат, бутун жаҳон металлургия соҳаси корхоналари, балки бошқа жаҳон ишлаб чиқарувчилари ҳам ҳис қилмоқда. Жаҳон бозорида умуман ва жумладан бизнинг маҳсулотга нархларнинг пасайиши сабабли биз ўтган йил якунларига кўра кўзлаганимиздек фойда ололмадик. Бироқ биз шунга қарамай фойда кўрдик. Бунинг учун маҳсулот таннархи масаласида кўп ишлашга тўғри келди. Мен комбинат бунинг уддасидан чиқди, деб ҳисоблайман. Афсуски, инқироз чўзилиб кетди ва у яқин орада тугашига умид йўқ. Бироқ биз бунга тайёрмиз ва таннархни камайтириш, ишлаб чиқариш ҳажмлари ва ишлаб чиқарилаётган маҳсулотлар турини янада кўпайтириш йўналишида ишлашни давом эттирмоқдамиз”, деб айтмоқда Фарманов.

Фармановнинг айтишича, комбинатда структуравий ўзгартиришларни таъминлаш, ишлаб чиқаришни модернизациялаш ва диверсификациялаш бўйича 2015-2019 йилга мўлжалланган чора-тадбирлар дастури ишлаб чиқилган. Дастурда янги қурилишларни амалга ошириш, мавжуд ишлаб чиқаришларни модернизациялаш ва реконструкциялаш бўйича инвестицион лойиҳаларни амал ошириш кўзда тутилган.

Комбинатда 2015 йилда сульфат кислота цехи ишга туширилди, кислород блокининг техник қайта жиҳозланиши якунланди. Шунингдек, “Мисни бойитиш фабрикасининг майдалаш ва янчиш бўлимлари реконструкцияси” лойиҳасини амалга ошириш якунига етмоқда, бу йилига қўшимча яна 7 млн тонна мисни қайта ишлашга имкон беради.

Комбинатда, шунингдек, экспорт салоҳиятини оширишга қаратилган фаолият муҳим жиҳатлардан бўлди. Комбинат мис қувурлари билан жаҳон бозорига чиқди, мис сими экспорт қилинмоқда. 2015 йилда бу маҳсулотдан 1000 тоннадан кўпроқ ишлаб чиқарилиб, хорижга экспорт қилинган. Шунингдек, комбинатнинг энг ёш бўлимларидан бири – цемент заводи яхши натижалар кўрсатмоқда. Цемент маҳсулотининг бир қисми ҳам экспортга чиқарилган.

Фарманов комбинат бўлимларининг фаолиятига якун ясаб, барча қийинчиликларга қарамасдан, комбинат барқарор ишлагани ва келгусида барқарор ишлаш учун асос яратганини ҳамда бу энг асосийси эканлигини таъкидлаб ўтди.