Bild: Кёльнда Янги йил кечаси одамларга ҳужум қилган муҳожирлар уларни Германияга Меркель таклиф қилганини айтишган

Германиянинг Кёльн шаҳрида Янги йил кечаси аёлларга оммавий равишда ҳужум қилишда иштирок этган муҳожирлар намойишкорона тарзда паспортларини йиртиб, полиция уларни ҳибсга олишга ҳақи йўқлиги, чунки улар Германияга Ангела Меркель таклифи билан келишганини айтган, деб маълум қилинмоқда Bild немис газетаси томонидан чоп этилган ҳисоботда.

Нашрнинг таъкидлашича, Кёльн собори ва шаҳар вокзали биносида нима содир бўлгани батафсил сўзлаб берилган ҳисобот полициянинг мутлақ кучсизлигини кўрсатди.

Ҳисоботда айтилишича, спиртли ичимлик ва гиёҳванд моддалар таъсири остида бўлган қоидабузарлар, асосан мухожирлар, Кёльн собори олдидаги майдонда йиғилиб, оломонга қарата петардалар учирган, шиша идишлар отган, одамларнинг сумка ва ҳамёнларини тортиб олган, аёлларга тажовуз қилган.

Полициячилар вазиятнинг қалтислигини инобатга олиб, майдондан одамларни эвакуация қилишга қарор қилишган, чунки ўша лаҳзада ҳукм сурган “бетартиблик” жароҳатлар ва ўлим билан тугаши мумкин бўлган. Қоидабузарлар кейинроқ гуруҳларга бўлиниб, шаҳарнинг турли қисмларида жиноятларни амалга оширишда давом этган.

Ҳисоботда таъкидланишича, муҳожирлар ўзларининг жазоланмасликларини ҳис қилиб, ҳуқуқ-тартибот муассасаларига ўта ҳурматсизлик қилишган. Улар полиция кўз ўнгида ўз паспортларини йиртиб, “эртага яна янгисини бемалол олишлари мумкинлигини” айтишган.

“Мен Сурияданман, сиз мен билан дўстона муносабатда бўлишингиз керак! Мени бу ерга Меркель таклиф қилди”, деб айтган қўлга олинганлардан бири.

Кёльн полицияси 5 январда Янги йил кечаси “африкалик ва араб қиёфасидаги” эркаклар томонидан жинсий тажовузга учраган 90 га яқин аёлдан шикоят олган.