Латвиянинг AirBaltic авиакомпанияси иккинчи йил жаҳонда энг пунктуал авиакомпания деб топилди

Латвиянинг AirBaltic миллий авиакомпанияси йил якунларига кўра кетма-кет иккинчи йил жаҳондаги энг пунктуал авиакомпания деб топилди. Бундан авиацияга тегишли маълумотлар соҳасида жаҳон етакчиси ҳисобланадиган OAG компаниясининг маълумотлари гувоҳлик бермоқда. Компания 50 млн дан кўпроқ парвозни таҳлил қилиб, жаҳоннинг энг яхши авиакомпаниялари рўйхатини тузди. 

Авиакомпания матбуот хизматининг 7 январда маълум қилишича, OAG маълумотларига кўра, AirBaltic 2015 йилда Болтиқбўйи давлатларини Европа, Яқин Шарқ, Россия ва МДҲдаги манзиллар билан боғловчи рейсларда 94,4 фоизлик пунктуаллик, яъни манзилга ўз вақтида етиб бориш кўрсаткичига эришган. Бу, авиакомпания 10 та рейсдан 9 тасидан кўпида манзилга ўз вақтида етиб келишини англатади.

“Бизнинг мижозлар барқарор тартибли хизматга ишонсалар бўлади. Бу йилдаги рейтингнинг етакчи ўнталигида ўтган йилдагига нисбатан камроқ сонда европалик авиаташувчилар бор бўлгани учун биз AirBaltic жамоаси иккинчи йил бундай натижага эришаётганидан фахрланамиз”, деб айтди авиакомпаниянинг ижрочи директори Мартин Гаусс.

“Авиакомпаниялар ва аэропортларнинг пунктуаллик кўрсаткичи авиация соҳасида муҳим роль ўйнайди ва келгусида бу соҳада ижобий ўзгаришлар яратиши мумкин. AirBaltic’нинг бутун жамоасига улкан табрикларимизни билдириб қоламиз: рейтингда бир марта ютиш – бу аъло натижадир, бироқ бизнинг соҳада бундай ғалабага кетма-кет иккинчи йил эришиш – бу қойилмақом натижадир ҳамда компания раҳбарияти ва барча ходимларининг ўз ишининг усталари эканлигининг тасдиғидир”, деб айтди ўз навбатида OAG ижрочи вице-президенти Джон Грант.

AirBaltic авиакомпаниясига 1995 йилда асос солинган. Компаниянинг асосий акциядори Латвия давлати ҳисобланади, у компаниянинг 99,8 фоиз улушига эга. Авиакомпания паркида ҳозирги кунда 12 та Boeing 737 ва 12 та Q400 NextGen маркасидаги Bombardier самолёти бор. Авиакомпания Ригадан 60 дан кўпроқ манзилга тўғридан-тўғри рейслар амалга оширади.