Америкалик аёл 2,6 млн долларлик Страдивари скрипкасини поездда унутиб қолдирди

Германия бўйлаб саёҳат қилаётган америкалик аёл 2,6 млн долларлик Страдивари скрипкасини поездда унутиб қолдирди. Бу ҳақда Reuters ахборот агентлиги маълум қилди.

Ушбу воқеа Мангейм–Саарбрюккен йўналишидаги поездда юз берди. Мўлжалланган станцияга келгач, скрипкачи аёл купени скрипкасиз тарк этган ва бир оз вақт ўтгандан кейин скрипкасини вагонда унутиб қолдирганини пайқаган. Аёл шу заҳотиёқ полициячиларга мурожаат қилган. Поезд Мангеймга қайтишига бир дақиқа қолганда полициячилар скрипкани топишга муваффақ бўлишган.

Скрипка буст-бутун кўринишда ўз эгасига қайтарилган. Полициячиларнинг айтишича, аёл уларга ҳаддан ташқари миннатдорчилигини билдирган.

Унутиб қолдирилган скрипка 1727 йилда ясалган ва General Dupont Grumiaux деб номланади.