Bild: Кёльндаги зўравонлар уларни Меркель “таклиф” қилганини айтишган

Германиянинг Кёльн шаҳрида Янги йил кечаси аёлларга уюштирилган ҳужумларда иштирок этган муҳожирлар ўз паспортларини йиртиб ташлаб, полиция уларни қўлга ололмаслигини, чунки мамлакатга улар канцлер Ангела Меркель томонидан таклиф қилинганини айтишган. Бу ҳақда Bild нашри ёзмоқда.

Нашрнинг таъкидлашича, Кёльн собори олдидаги майдон ва шаҳар вокзали биносида содир этилган зўравонликлар полициянинг бу борада кучсизлигини кўрсатиб берган.

У ерда зўрлик ва ўғрилик содир этган муҳожирлар наркотик ва спиртли ичимликлар таъсирида бўлиб, оломонга қарата петардалар ва шишалар улоқтирган, аёлларнинг сумкаларини тортиб олган. Воқеа жойида бўлган полиция ходимлари аҳолини майдондан эвакуация қилиш қарорига келган.

Аммо шундан сўнг жиноятчилар гуруҳларга бўлиниб, шаҳарнинг турли чеккаларида зўравонлик ва талончиликни давом эттирган.Таъкидланишича, муҳожирлар ҳуқуқ-тартибот органларига нисбатан ҳурматсизлик кўрсатиб, улар билан баҳсга киришишган. Айримлари қўлларидаги вақтинчалик гувоҳномаларни йиртиб ташлаб, эртагаёқ янгисини ололишини айтган.