NYT: Билл Клинтон 15 йил олдин Путинни мақтаган эди

1993 йилдан 2001 йилгача АҚШ президенти бўлган Билл Клинтон 15 йил олдин, ўз президентлик муддати якунланиши арафасида 2000 йилда Россия президентига айланган Владимир Путинни мақтаган эди. Бу ҳақда New York Times нашри собиқ президентнинг 1997 йилдан 2000 йилгача амалга оширилган расмий телефон мулоқотларини ўрганиш натижасида маълум қилди.

Клинтон бундай телефон мулоқотларида ўша кунларда Ироқ, Косово ва Шимолий Ирландияда содир бўлаётган воқеаларга муносабатларини билдириб ўтган. 532 саҳифадан иборат маълумотлар базасида шунингдек, Клинтон Путиннинг Россияга янги раҳбар сифатида келишини мамнунлик билан қабул қилганини билиш мумкин.

"Менинг ҳисоблашим бўйича, Путин катта потенциалга эга. У ақлли ва яхши фикрлайди. Ўйлайманки, биз у билан биргаликда кўп яхши ишларни амалга оширамиз", деганди Клинтон 15 йил олдин.

Бошқа бир жойда эса Клинтон Путинни "олийжаноб ишлар амалга ошириши мумкинлиги" лекин у ҳозирча бу ниятларини амалга оширишга шошилмаётганини қайд этган.