ОАВ: Террорчилар Европанинг йирик шаҳарларида навбатдаги терактларни содир этиш билан таҳдид қилишди

"Ал-Қоида" террорчилик ташкилоти Италиянинг Неаполь ва Рим ҳамда Испания пойтахти Мадрид шаҳрида терактлар содир этиш билан таҳдид қилинган видеосини тарқатган. Бу ҳақда Europa Press агентлиги хабар берган.

Маълум қилинишича, видеода Малидаги жангарилар гуруҳи вакили, келиб чиқиши испаниялик, Шимолий Африкадаги Мелильи анклавида (Марокаш билан чегарада) туғилган Абу ал-Нур ал-Андалусийнинг чиқиши ҳам бор.

Испаниядаги махсус хизматлар айни вақтда бу видеони диққат билан ўрганишмоқда.

Маълумот учун, кейинги бир неча йил ичида Испания фуқаролигига эга бўлган 130 нафарга яқин киши Африка ва Осиё ҳудудидаги жангарилар сафига бориб қўшилган. 2015 йил давомида Испанияда 100дан ортиқ киши жангарилар билан алоқадорликда гумон қилиниб, қўлга олинган. Кейинги 4 йил ичида бундай кишиларнинг умумий сони 175 кишини ташкил этган.