Туркия денгиз ва ҳаво йўллари орқали кириб келувчи сурияликлардан виза талаб қилади

Эндиликда Сурия фуқаролари Туркия ҳудудига денгиз ёки ҳаво йўллари орқали кириш учун визага эга бўлишлари керак бўлади. Бу ҳақда Туркия ТИВ матбуот котиби Танжу Бильгич маълум қилган. Унинг айтишича, бу ҳақдаги қарор 2015 йилнинг декабрида қабул қилинган ва бугундан кучга киради.

"8 январь кунидан эътиборан Туркия ҳудудига ҳаво ва денгиздаги чегаралар орқали кирмоқчи бўлган сурияликлар албатта визага эга бўлишлари талаб этилади. Аммо қуруқликдаги чегараларда "очиқ эшиклар" сиёсати юритилиши давом этади", дейди у.

Унинг айтишича, бундай янги тартибнинг киритилишига ноқонуний миграция билан курашиш зарурати сабаб бўлди.

Туркиядаги нашрларда ёзилишича, янги тартиб Суриядан кириб келувчилар оқимини назорат қилиш имконини беради. Бунгача Миср ва Ливиядан кириб келувчилар учун ҳам шундай тартиб жорий қилинганди. Туркия Сурия Араб республикаси фуқаролари учун чегараларини очиб қўйгач, кўпчилик бу мамлакат ҳудудидан ноқонуний йўл орқали Европага ўтишда фойдалана бошлади.

Туркия ва Сурия ўртасида 2009 йилда визасиз режим жорий қилинганди. Сурияда ҳарбий ҳаракатлар бошланганидан буён Туркия ҳудудига 2 миллиондан ортиқ сурияликлар кириб келган. Улардан 250 минг нафардан ортиғи Туркия ҳукумати томонидан махсус ташкил этилган қочқинлар лагерларида яшамоқда. Қолганлар эса катта шаҳарлар атрофларида жойлашиб олишган. Анқара шу вақтгача суриялик қочқинлар учун 8 миллиард доллар маблағ сарфлаганини маълум қилган.

Сурия ва Туркия ўртасидаги визасиз режим тугатилди