Guardian: Aramco’нинг хусусийлаштирилиши мумкинлиги бозор иштирокчиларини шок аҳволига келтириб қўйди

Дунёдаги энг йирик нефть экспортчиси – Саудия Арабистонининг Saudi Aramco давлат корпорациясининг IPO (биржага акцияларни бирламчи жойлаштириш) орқали хусусийлаштириш борасида ошкор қилинган режалар бозорда саросимани келтириб чиқарди, деб ёзади The Guardian нашри.

Агар Aramco бундай қадамни ташласа, биржага акциялари жойлаштирилган энг қиммат компанияга айланади, Apple, Exxon Mobil ва Google сингари гигантлардан ўтиб кетади, деб ҳисоблайди мақола муаллифи.

Саудия Арабистонининг иккинчи валиаҳд шаҳзодаси Муҳаммад ибн Салмоннинг ҳукумат давлат компанияси IPO операциясини амалга оширишини муҳокама қилгани ҳақидаги баёноти нефть секторини шокка тушириб қўйди, деб эслатиб ўтади нашр.

Айни пайтда соҳа мутахассислари Aramco акцияларининг эркин сотилиши Саудиянинг нефть нархларини тушириш стратегиясига қай даражада таъсир ўтказишини муҳокама қилмоқда.

Шу билан бирга, таъкидланишича, компания акцияларининг эркин сотувга чиқарилиши Саудия расмийлари кутмаган муаммоларни келтириб чиқариши мумкин. Жумладан, акциядорлар ва ғарблик инвесторлар компаниянинг бошқарилиши, ривожланиш истиқболлари ва бошқа тафсилотларни билишни хоҳлайди.“Саудияликлар ғалати вақтда ғалати ғояни илгари суришди”, - хулоса қилди CNBC нашри.