Ўзини Жон Кеннеди ва Мерилин Монронинг ўғли деб айтган эркак Обаманинг итини ўғирлаб кетмоқчи бўлди

АҚШ полицияси Оқ уйдан АҚШ президенти Барак Обаманинг португал сув ити зотига мансуб иккита итидан бирини ўғирлаб кетмоқчи бўлганини тан олган, тиш-тирноғигача қуролланган 49 ёшли эркакни ушлаб олди.

Скотт Стокерт исмли эркак махсус хизматлар агентлари томонидан ушланган. Гумонланувчи ушланиши пайтида унинг автомобили ўриндиғи тагидан сочма ўқ отувчи милтиқ, милтиқ, ўқлар, полициячилар тўқмоғи ва мачете топилган.

Махсус хизматлар ходимларининг айтишича, улар бундай вазиятга биринчи бор дуч келишган. Стокертнинг таъкидлашича, унинг асл исми “Исо Масиҳ” бўлган. Эркак полициячилар бунга ишонч ҳосил қилишлари учун унинг ҳайдовчилик гувоҳномасига қарашлари мумкинлигини айтган. Эркак ўзининг “Исо Масиҳ” эканлигини исботлаш билан бирга ўзини 1963 йилда ўлдирилган АҚШнинг собиқ президенти Жон Кеннеди ва унинг маъшуқаси – киноактриса Мэрилин Монронинг ўғли деб айтган.

Барча бу “алаҳсирашлардан” кейин эркак ўзини қўйиб юборишларини, чунки унинг режасида ҳали Капитолий биносига кириб, ўзини президент лавозимига номзодини қўйишини эълон қилиш кераклигини айтган.

The Washington Post газетасининг маълум қилишича, эркак Вашингтондаги меҳмонхоналардан бирига келгандан бери агентлар кузатувида бўлган. Бироқ махсус хизматларга Стокерт фақатгина Бо ёки Санни лақабли “АҚШнинг биринчи итларидан” бирини ўғирламоқчи бўлгани маълум бўлган.

Айни пайтда эркак қўйиб юборилган. Бундай қарор дастлабки суд жараёнида қабул қилинди. Кейинги суд жараёнлари санаси ҳозирча белгиланмаган. Эркак махсус хизматлар кузатуви остида бўлади ва эҳтимол суд унга руҳий муаммоларга эгалиги сабабли даволаш курсини белгилаши мумкин.