ОАВ: Филиппинда ИШИД халифалиги тузилди

Филиппиннинг Минданао оролида маҳаллий жангари гуруҳлар ИШИДга байъат қилиб ва янги халифалик тузишгани ҳақида эълон қилишди. Бу ҳақда The Australian нашри хабар тарқатган.

Нашрга жойлаштирилган видеолавҳада айтилишича, Филиппиндаги жангари гуруҳларнинг 4та гуруҳи раҳбарлари ИШИД раҳнамоси Абу Бакр ал-Бағдодийга қасамёд қилишган.

Қайд этилишича, бу видеолавҳа ўтган ҳафтанинг жума кунида интернетга жойлаштирилган ва кўп вақт ўтмасдан олиб ташланган.

"Сурияга кириб бориши чекланган янги ёлланганлар эндиликда Филиппинда ҳарбий машғулотлар ўтказиб, кейин Австралияга ҳужумлар уюштиришади", дейилган хабарда.

Сиёсий зўравонлик ва терроризм масалалари бўйича халқаро марказ директори Роҳан Гунаратнанинг айтишича, Филиппиндаги бу 4та гуруҳ расмий Маниланинг назоратидан ташқарида ҳаракатланади.

Гунаратнанинг огоҳлантиришича, "ИШИДнинг янги вилояти"ни "Абу Сайяф" номли гуруҳ раҳбари Иснилон Хапило бошқаради ва у Австралия ҳамда Жанубий-Шарқий Осиё учун жиддий хавф солади.

Австралиялик сиёсий шарҳловчи Грег Бартоннинг фикрича, Филиппиндаги воқеалар ИШИД жангарилари стратегияси ўзгарганидан далолатдир. Унинг фикрича, жангарилар Сурия ва Ироқни эгаллашда жиддий қаршиликка дуч келишгач, ўз фаолиятлари учун янги ҳудуд ахтаришмоқда.