Туркия бош вазири Истанбулдаги портлаш ижрочиси ИШИД аъзоси бўлганини айтди

Туркия бош вазири Аҳмад Довудўғли брифинг вақтида Истанбулда содир этилган теракт ижрочисининг шахси тасдиқланганини, у ИШИД аъзоси бўлганини айтган.

У шунингдек, теракт қурбонларининг барчаси хорижлик сайёҳлар эканини маълум қилган.

"Портлаш 1988 йилда Сурияда туғилган ҳудкуш-террорчи томонидан амалга оширилгани исботланди. Бу маълумот ҳодиса жойида олинган унинг тана бўлаклари орқали аниқланди.

Яна бир бор таъкидлайманки, энди Туркия жангариларга қарши янада жиддийроқ кураш олиб боради", — деди бош вазир СNN Turk телеканали орқали.

Бугун маҳаллий вақт билан соат 11:20да Истанбул шаҳрининг Султонаҳмад туманидаги майдонда террорчи ўзини портлатиши туфайли 10 киши ҳалок бўлди ва 15 киши жароҳатланди. Ҳалок бўлганларнинг 9 нафари германиялик сайёҳлар бўлишган. Шунингдек, бу терактда Норвегия ҳамда Перу фуқаролари бўлган сайёҳлар жабрланган.

Портлаш содир этилгандан кўп вақт ўтмай, террактга доир ҳар қандай турдаги маълумот: хабар, интервью, танқид ва шу каби мақоларлар даврий нашрлар, телевидение, радио, интернет нашрлар ва ижтимоий тармоқларда ёритилиши Туркия ҳукумати томонидан тақиқлаб қўйилди. Ҳукумат қарори эълон қилинган пайтдан бошлаб кучга кирган, бу ҳақда барча турк ОАВлари огоҳлантирилган.