ФИФАда яна бир йирик амалдор истеъфога чиқарилди

Халқаро футбол уюшмаси ФИФА коррупция билан боғлиқ жиноятларда айбланаётган ташкилот Бош котиби Жером Валькенинг истеъфога чиқарилганини расман маълум қилди. Хабар ташкилот расмий сайтига жойлаштирилган.

Валькени истеъфога чиқариш бўйича қарор 9 январь куни қабул қилинган. ФИФА Бош котиби лавозимини Маркус Каттнер вақтинчалик бошқаришда давом этади.

Олдинроқ, унинг ФИФА ахлоқ қоидларининг бир неча нормаларини бузгани, жумладан турли совғалар ва турли имтиёзларни маълум манфаат йўлида қабул қилгани аниқланганди.

2015 йилнинг 8 октябрида Вальке 90 кунга футболдаги фаолиятидан четлаштирилган, кейинчалик бу муддат яна 45 кунга узайтирилганди. 7 январь куни ФИФА ахлоқ қўмитасининг арбитраж палатаси унга нисбатан иш очилганини эълон қилганди.