Обаманинг Россия ва Украина муносабатлари ҳақидаги фикрлари тушунмовчиликларга сабаб бўлди

АҚШ президенти Барак Обаманинг Конгрессга йўллаган “Мамлакатдаги вазият тўғрисида”ги мурожаатида Украинанинг “Россиянинг мижози” деб аталгани америкаликларнинг эътирозларига сабаб бўлди, деб хабар бермоқда РИА Новости агентлиги.

“Россия ўзига мижоз бўлган давлатлар – Украина ва Сурияни қўллаб-қувватлашга ресурслар йўналтирмоқда, аммо улар унинг таъсир доирасидан чиқиб кетмоқда”, - деб таъкидлаган эди Обама.

“Обама Украинани Россиянинг “мижози” деб ўйлайдими? У Киевга мудофаа қуролларини етказиб бермаётгани ҳайратланарли эмас”, - деб ёзди The Washington Post колумнисти Жексон Дил Twitter’даги микроблогида.

АҚШнинг Украинадаги собиқ элчиси Стивен Пайфер Обаманинг сўзларини “ғалати” деб баҳолади.“Москва ресурсларини Украинадаги вазиятни беқарорлаштириш учун йўналтирмоқда”, - деб таъкидлади у.

Халқаро тинчлик учун Карнеги жамғармаси раҳбари Эндрю Уайс Обама Россия томонидан Украинанинг илгариги раҳбарияти қўллаб-қувватланганлиги назарда тутилганини тахмин қилди. Иллинойс вакили бўлган конгрессмен Питер Роскэм эса президентни халқаро сиёсатни тушунмасликда айблади.

“Дўстимиз ва иттифоқчимиз Украина “Россиянинг мижози” деб аталса, бу геосиёсий вазият тўғри тушунилмаётганидан дарак беради”, - деб фикр билдирди у Twitter орқали