2015 йилда одам контрабандаси билан шуғулланган жиноятчилар 6 млрд доллар даромад қилишган

2015 йилда одамларни бошқа мамлакат ҳудудига ноқонуний йўллардан олиб бориш билан шуғулланадиган жиноятчилар 3 млрд доллардан 6 млрд долларгача даромад қилишган. Бу ҳақда Европол раҳбари Роб Уэйнрайтга асосланиб, The Independent хабар тарқатган.

Унинг сўзларига кўра, муҳожирларнинг ноқонуний ҳаракатланиши орқали жиноятчилар чўнтагига келиб тушаётган даромад миқдори ўтган йилда гиёҳванд моддалар ташувидагидан кўпроқ бўлган.

Қайд этилишича, Европага Африка ва Осиёдан ўтган муҳожирларнинг 90 фоизидан ортиғи ўзларини бу қитъага олиб келганлари учун жиноятчиларга пул тўлашган.

"Бизнинг маълумотимизга кўра, ҳар бир муҳожир учун жиноий гуруҳлар 3 мингдан 6 минг долларгача бўлган маблағни олишган. Йўлларнинг оғирлиги ва ишончсизлиги ҳисобга олинса, бу ўта инсофсизлик", дейди Роб Уэйнрайт.

Унинг қўшимча қилишича, 2015 йилда Европол одамлар савдоси билан шуғуллангани гумон қилинган 10 мингдан ортиқ кишига қидирув эълон қилган.

2015 йилда Европага 1,1 миллиондан ортиқ ноқонуний муҳожир кириб келганди.