McLaren компанияси треклар бўйлаб мустақил юра оладиган суперкарлар яратмоқчи

McLaren компанияси автоном бошқарув функцияларига эга, пойга треклари бўйлаб мустақил ҳаракатлана оладиган автомобилларни яратиши мумкин. Бу ҳақда Blackbird Automotive нашрига интервьюда британ маркасининг шеф-дизайнери Фрэнк Стивенсон маълум қилди.

2014 йилда Audi компаниясининг RS7 модели негизида қурилган автоном бошқарувга эга прототип “Хоккенхаймринг” автодромини мустақил равишда 2 дақиқа 10 сонияда ўта олган. “Дунёдаги энг тезкор ҳайдовчисиз машина” деб аталган бу машинанинг максимал тезлиги соатига 240 км ни ташкил қилган.

“Эҳтимол келажакда McLaren’да сизни пойга трассасида сайр қилдирувчи автомобиллар пайдо бўлиши мумкин. Мисол учун, улар учта: “секин”, “ўрта” ва “жуда тез” тезлик режимига эга бўлишлари мумкин”, деб айтди Стивенсон.

Стивенсоннинг фикрича, бундай тизим ўзида нафақат кўнгилочар функцияни намоён қилган бўларди, балки ҳайдовчига трекни максимал тез ўтиш учун энг оқилона таректория ва тезланишни кўрсатган ҳолда уни тўғри ҳаракатланишга ўргатиши мумкин бўларди.

Стивенсон, шунингдек, келгусида водородда ишловчи двигателлардан фойдаланиш қазилма ёнилғилардан энергиянинг бошқа манбаларига ўтишда боғловчи бўғин бўлиши мумкинлигини айтди ва автомобилларда ядровий энергиянинг ишлатилиши имкониятини “ўрганиш учун лойиқ” деб тахмин қилди.

“Агар биз бироз таваккалчироқ бўлганимизда ва ностандарт фикрлаганимизда, ядровий автомобилларни ишлаб чиқилишини кўриб чиқардик. Ҳа, улар бироз хавфлироқ бўларди, бироқ бошқа томондан биз бундай технологиялардан сув ости кемаларида фойдаланмоқдамиз-ку”, деб таъкидламоқда Стивенсон.

Аввалроқ McLaren’нинг “Формула-1” жамоаси келажак пойга болиди қандай бўлишини кўрсатишга чақирилган MP4-X концептини ишлаб чиқди. Прототип ҳавони плазмага айлантирувчи аксқанотлар, тўлдирилган реаллик кокпити (ҳайдовчи ўтирадиган жой), мия импульсларини бошқариш тизимини олди.