АҚШда озод этилган эронликлар ўз ватанларига қайтишни исташмади

АҚШда Эрон билан маҳбусларни ўзаро алмашиш доирасида озод этилган эронликлар ўз ватанларига қайтишни исташмади ва АҚШда қолишни лозим топишди. Бу ҳақда вазият билан таниш амалдорларга иқтибос келтирган ҳолда ABC телеканали маълум қилди.

Ҳаммаси бўлиб Эронда ушлаб турилган 5 нафар америкаликни 7 нафар эронликка алмаштириш кўзда тутилганди. Ўтган якшанба куни уларнинг барчаси бетараф ҳудудга – Женевага етказилиши керак эди. Бу ерда маҳбуслар билан ўзаро алмашиш амалга оширилиши керак эди.

Бироқ телеканал маълумотларига кўра, озод этилган эронликлардан бирортаси самолётга ўтирмаган. Озод қилинган 7 нафар эронликдан 6 нафари Эрон фуқаролигидан ташқари АҚШ фуқаролигига ҳам эга. Уларнинг ўзлари Эронга қайтишни исташмаган, чунки бу ерда уларнинг оилалари бор.

Бироқ самолёт Женевага барибир учиб кетган, чунки у Эронда озод қилинган америкаликларни Германиянинг Ландштуль шаҳрига етказиши керак эди. USA Today нашри маълумотларига кўра, бу ерда озод этилган америкаликлар ҳарбий шифохонада даволанадилар.

ABC’нинг маълум қилишича, озод этилган 5 нафар америкаликдан 3 нафари – The Washington Post нашри журналисти Жейсон Резаян, АҚШнинг собиқ аскари Амир Ҳикматий ва насроний пастор Саид Абединий Женевага учиб келган. Яна бир озод этилган америкалик Мэтью Тревизик тижорий рейс билан АҚШга учиб кетган. 5-маҳбус Нусратуллоҳ Ҳусравий эса Эронни тарк этишдан бош тортган.