«Вольфсбург» FIFA 16 ўйинлари бўйича вице-чемпион билан шартнома имзолади

Германиянинг «Вольфсбург» клуби киберспорт йўналишидаги фаолиятини кенгайтирганини эълон қилди. Бу ҳақда клуб расмий сайтида хабар берилган.

Клуб FIFA 16 бўйича инглиз геймери Дэвид «DaveBtw» Байзевей билан шартнома имзолади. Бундан ташқари «Вольфсбург» геймерлар учун стуллар ясаб берувчи NEEDforSEAT компанияси билан ҳам шартнома имзолаган.

«Бу бу йўналишда немис клублари ичида етакчи бўлишни истаймиз. Бизнинг мақсадимиз реал ва виртуал футбол ўртасидаги боғлиқликни яна ривожлантиришдан иборат.

FIFA йилдан йилга барчасини реал футболга ўхшатиб бормоқда ва фанатлар ҳамда профессионал футболчилар орасида оммалашиб бормоқда», – дея таъкидлаган «Вольфсбург» спорт директори Клаус Аллофс.

Олдинроқ «Вольфсбург» Бенедикт «Salz0r» Сальцер билан шартнома имзолаганди. У бир неча маротаба FIFA ўйинида клуб номидан иштирок этган.

Тез орада иккала киберспортчилар Go4Cup ва Gfinity онлайн-чемпионатларида иштирок этишади. Сальцер 22-24 январь кунлари Германияда бўлиб ўтадиган Dreamhack Leipzig мусобақасида ҳам иштирок этиши кўзда тутилган.

Қайд этиб ўтиш жоиз, Дэвид «DaveBtw» Байзевей 1993 йилда Англияда туғилган. FIFA (FIWC) нинг 2014 йилда Рио-де-Жанейрода ташкил этилган жаҳон чемпионатида вице-чемпион унвонини қўлга киритганди.