АҚШнинг ИШИДга қарши ҳарбий кампанияси харажатлари 5,5 млрд долларни ташкил қилди

АҚШнинг ИШИДга қарши ҳарбий кампанияси харажатлари 2014 йил сентябридан 5,5 млрд долларни ташкил қилган. Бу ҳақда Ироқ ва Сурияда аксилтеррорчилик операциясида иштирок этаётган АҚШ қўшинлари гуруҳининг расмий вакили Стив Уоррен маълум қилди. Уоррен Бағдоддан уюштирилган телекўприк ёрдамида Пентагон матбуот марказида йиғилган журналистлар билан матбуот анжумани ўтказди.

“Террорчиларга қарши курашга ҳар куни 11 млн доллар сарфланмоқда”, деб айтди Уоррен ҳамда операция давомида АҚШ ҳарбий самолётлари 65492 та жанговор парвоз амалга оширгани ва ИШИДнинг позицияларига 9782 та зарба берганини маълум қилди.

Бу зарбалардан учдан икки қисми Ироқ ҳудудига, қолгани Сурия ҳудудига тўғри келган. Пентагон агар бир нечта самолёт бир вақтда бир нишонга зарба берган бўлса, буни битта зарба деб қабул қилади. “2015 йил майидан коалиция ИШИДнинг юқори ва ўрта бўғиндаги 95 етакчисини ва бир неча минг оддий жангарини йўқ қилган”, деб қўшимча қилди Уоррен.

АҚШ жангариларнинг Ироқдаги позицияларини 2014 йил 8 августидан, Суриядаги позицияларини эса 23 сентябрдан бошлаб бомбардимон қилишни бошлаган. Ироқдаги жанговор ҳаракатларда АҚШ авиацияси билан бирга Австралия, Буюк Британия, Иордания, Канада, Нидерландия ва Франция, Сурияда эса Австралия, Баҳрайн, Буюк Британия, Иордания, Канада, БАА, Саудия Арабистони, Туркия ва Франция самолётлари иштирок этмоқда.