Номини ошкор этмаган чилилик теннисчи доимий равишда келишилган ўйинларда қатнашганини тан олди

Чилилик теннисчи ўз шахси сир тутилишини сўраган ҳолда маҳаллий нашрларга интервью бериб, ўзининг доимий равишда келишилган ўйинларда иштирок этиб келгани ҳақида маълум қилган. Унинг айтишича, у ўзининг иқроридан афсусланмайди. Спортчи кичик миқёслардаги турнирларда шундай ишларда иштирок этиб келганини билдирган.

Бундан олдинроқ, Show Legend портали сўнгги 10 йил давомида халқаро теннис рейтингида кучли 50 таликдан жой олиб, теннисдаги келишилган ўйинларда қатнашгани гумон қилинаётган 16 нафар теннисчининг исмини ошкор этганди. Уларнинг баъзилари "Катта дубулға" туркумидаги турнирларда қинғир ишларни амалга оширгани гумон қилинган.

Чилилик теннисчи шунингдек, Халқаро теннис федерациясига аноним мактуб йўллаган.

«Мен профессионал теннисчиман, менда ATP таснифида тўпланган очколар бор. Мен асосан «Фьючерс» ва «Челленжер» таснифидаги турнирларда иштирок этганман. Фаолиятимни энди бошлаган пайтларимда менга бир одам келган ва «Фьючерс» таснифидаги турнирнинг биринчи босқичида мағлубиятга учрашим учун 1,5 минг доллар таклиф қилган. Мен бу таклифни рад этганман ва учрашувда ғалаба қозонганман. Орадан бир ҳафта муддат ўтиб, менга энди 2 минг доллар таклиф қилишган. Мен бунга рози бўлганман, бироқ бутунлай шубҳа билан қараганман. Мен фақатгина иккита геймда ғалаба қозонганман. Чўнтагимда эса мукофот жамғармасидан теккан 117 доллар пул ва таклиф қилинган 2 минг доллар бор эди», – дейди спортчи.

«Кейинчалик мен ота-онамнинг моддий ёрдамига қараб қолмаслик учун жуда кўплаб ўйинларни сотишда иштирок этдим. Мен бугун ҳам бу ишни қилишни давом эттирмоқдаман. Айниқса, сентябрда энг кўп марта бу ишни амалга оширдим. Бунинг учун ҳеч кимга эътироз билдирмоқчимасман ва бундан пушаймон ҳам эмасман. Чунки бу зарурият. Ташкилотчилар турнир соврин жамғармасини ошириш имкониятига эга эмас. Шунинг учун, мен ва менинг ҳамкасбларим ўйинларни сотишда давом этишмоқда», дея теннисчининг сўзларидан иқтибос келтиради 24horas.cl интернет нашри.

Ўзбекистоннинг биринчи ракеткаси Денис Истомин келишилган ўйинларда иштирок этгани гумон қилинмоқда

Британиялик теннисчилар бошқа спортчилар ҳақидаги маълумотларни букмекерлик идораларига пуллашган