Юрагида жарроҳлик амалиётини бошдан кечирган Латвия президенти ҳушига келди

Латвия президенти Раймонд Вейонис ҳушига келди. Бу ҳақда Delphi нашри жарроҳлик амалиёти ўтказилган шифохона раҳбарига таянган ҳолда хабар бермоқда.

Илгарироқ Вейонисга юрак клапанида ўчоғи жойлашган инфекцион касаллик ташхиси қўйилганидан сўнг у жарроҳлик бўлимига ётқизилгани ва амалиётдан ўтказилгани хабар қилинган эди.

Шифокорларнинг таъкидлашича, президент ўзига келган ва улар билан гаплашган. Ҳозирча у интенсив терапия хонасида қолмоқда, бир ҳафтадан сўнг у юрак жарроҳлиги бўлимига ўтказилади.