АҚШда собиқ полициячи афроамерикалик аёлларнинг номусига текканлик учун 263 йиллик қамоқ жазосига маҳкум қилинди

АҚШнинг Оклахома-Сити шаҳри (Оклахома штати) суди 21 январда оқ танли собиқ полициячи Дэниел Хольцклоуни афроамерикалик аёлларнинг номусига текканлик учун 263 йиллик қамоқ жазосига маҳкум қилди.

Биринчи навбатда ирқчилик ҳолати билан боғлиқлиги туфайли ОАВлар эътиборини тортган суд жараёни 2015 йилнинг ноябридан бери давом этиб келаётган эди. Полициячи умумий ҳисобда 13 нафар қора танли аёлга жинсий тажовуз қилганликда айбланди.

Оқ танли ва осиёлик америкаликлардан ташкил топган ҳукм чиқарувчилар ҳайъати 2015 йилнинг 11 декабрида узоқ давом этган муҳокамалардан кейин 29 ёшли Хольцклоуни айбловнинг 36 бандидан 18 таси бўйича айбдор деб топиб, максимал даражада қаттиққўллик билан жазолашни тавсия қилишганди. Айбланувчи кўзларига ёш олган ҳолда бу жиноятларни амалга оширмаганини таъкидлаган.

Маълумотларга кўра, аввал қонун билан муаммолари бўлган ва ночор туманларда яшаган аёллар Хольцклоунинг жабрдийдалари бўлган. У хизмат лавозимидан фойдаланиб, ўз қурбонларини жиноий тақиб қилиш билан қўрқитган. Ҳимоя эса жабрдийдаларнинг кўрсатмаларига ишониб бўлмаслиги ва полициячи ўз вазифасини муносиб бажарганини таъкидлаган. Хольцклоу унга айбловлар қўйилгандан кейин 2015 йил январида полициядан бўшатиб юборилган. У бунгача 3 йил полициячи бўлиб ишлашга улгурган.