Британияда лотереядаги 33 млн фунт стерлинглик ютуқни олгани ҳеч ким келмади

Буюк Британиядаги миллий лотерея ташкилотчилари лотереяда ўйналган жекпотнинг ярмини, яъни 33 млн фунт стерлинглик ютуқни ютган чипта эгасини қидиришмоқда, деб хабар бермоқда Daily Мail нашри.

Ютуқли комбинация эълон қилинганига қарамасдан, уни олгани ҳозирча ҳеч ким мурожаат қилмаган. Лотерея ташкилотчиси Camelot компанияси вакилининг айтишича, бу ҳолат ҳайрат уйғотмоқда.

Компания ютуқли чипта сотиб олинган Вустер шаҳрининг 100 мингга яқин аҳолисини чипта эгасини топиш мақсадида хабардор қилди. Агар ғолиб ютуқни олгани 180 кун давомида келмаса, унда жекпот шу суммага оширилади.

Жекпотнинг иккинчи ярмини шотландиялик оила ютиб олди.