Эгей денгизида иккита кема ҳалокатга учраши натижасида 12 киши оламдан ўтди

22 январь куни Эгей денгизи ҳудудида 2та кема ҳалокатга учраши туфайли, 12 муҳожир чўкиб кетган. Бу ҳақда "Вима" нашри хабар берган.

Грецияга тегишли Фармакониси ороли яқинида кема чўкиши туфайли 6 нафар бола ва бир аёл ҳалок бўлган. Туркиядан Грецияга етиб олиш учун сузаётган бу кема бортида жами 48 киши бўлган. Кеманинг омон қолган йўловчилари қирғоққа етказилган.

Шунингдек, Калолимнос ороли яқинида елканли кема ҳалокатга учраган. Кема йўловчиларини қутқариш ишларига қирғоқ мудофааси хизматининг 3та кемаси ва бир вертолёт жалб қилинган. Сувдан омон қолган 26 киши ҳамда 5 жасад чиқариб олинган.

Елканли кемада ҳалокатдан олдин неча киши бўлганига аниқлик киритилмаган. Хабарларда бу кема бортидагилар сони 100 нафаргача бўлгани айтилган.

Қайд этилишича, бу икки кема ҳалокатга учрашидан олдин ҳудудда ноқулай об-ҳаво шароити кузатилмаган.