“Камолот” фаоллари интернет ёрдамида ИШИДга қарши курашади

Яқин ойлардан бошлаб Тошкентда ИШИДнинг ёшларга таъсирига қарши кураш бўйича янги лойиҳа ишга тушади. Бу ҳақда Sputnik агентлиги пойтахт ҳокимиятидаги ахборот манбасига асосланиб хабар қилди.

Айни пайтда “Камолот” ёшлар ижтимоий ҳаракатининг Тошкент шаҳар кенгаши ҳамда Тошкент ислом университети пойтахт ҳокимияти кўмагида февраль ойида бошланиши лозим бўлган лойиҳанинг сўнгги деталларини ишлаб чиқишни якунламоқда.

“ИШИД феномени одатий ҳаёт тарзидан воз кечиб, Яқин Шарққа жанг қилишга йўл оладиган ёш йигит ва қизларни ёллашнинг самарали тизимини ишлаб чиқишга муваффақ бўлди. Ёллаш жараёнида исломнинг асл қадр-қиймати ёлғол тушунчалар билан ўрин алмашаётганда ёшларга атрофдагилар ёмон, ИШИД отрядларида эса ҳаммаси яхши экани айтилади”, - деди ахборот манбаси.

Унинг сўзларига кўра, айнан ушбу босқичда барча эътиборни кучайтириш ва ёш авлод онгига вайронкор ғояларнинг сингдирилишига йўл қўймаслик лозим. Бироқ ёшлар кўпинча катталарнинг сўзларини инкор қилади ёки салбий қабул қилади. Шунинг учун террористик ва экстремистик ғояларнинг зарарли экани тўғрисида ёш авлод вакилларига уларнинг тенгдошлари сўзлаб беришини кўзда тутган ташаббусни амалга оширишга қарор қилинди.

Лойиҳа икки асосий йўналишда амалга оширилади. Биринчисида Тошкент ислом университети талабалари ўз тенгдошлари учун интерактив семинарлар ўтказишади. Семинарлар интернет ёрдамида мамлакатимизнинг ҳар бир ҳудудидаги таълим муассасаларига трансляция қилиниши эвазига кенгроқ аудиторияни қамраб олишга имкон туғдиради.

Иккинчи йўналишда эса пойтахтимиздаги ҳар бир маҳалла ёшлари билан индивидуал иш олиб борилиб, уларда талабалар терроризм, миллатчилик ва экстремизмнинг зарарли эканини яққол мисоллар билан ҳикоя қилиб беришади.

Режага кўра, лойиҳа 2016 йил давомида олиб борилади. Шундан сўнг эксперт гуруҳи натижаларни баҳолаб, ушбу тажрибани бошқа ҳудудларда ҳам давом эттириш ва амалиётга татбиқ этиш бўйича қарор қабул қилади.