Reuters: Таиландда Малайзиянинг йўқолган Boeing самолёти бўлаклари топилгани тахмин қилинмоқда

Таиланд жанубида фалокатга учраган самолётнинг бўлаклари топилди. Бу бўлаклар 2014 йилда йўқолиб қолган, Malaysia Airlines авиакомпаниясининг Boeing 777-200 самолётига тегишли бўлиши мумкинлиги айтилмоқда. Бу ҳақда Reuters ахборот агентлиги маълум қилди.

Маҳаллий маъмурият раҳбари Таньяпат Паттхиконгпаннинг айтишича, катта эгик ҳолдаги металл бўлаги мамлакатнинг жанубидаги Накхонситхаммарат вилояти соҳилига сув билан чиқариб ташланган. Бу бўлак маҳаллий аҳоли томонидан топилган, улар бу ҳақда полицияга хабар беришган.

“Қишлоқ аҳолиси эни 2 метр, узунлиги 3 метр келадиган бўлакни топиб олишди”, деб айтди Паттхиконгпан.

Топилган бўлак ҳақидаги ахборот Таиланд ОАВларида унинг йўқолган Boeing’га тегишли бўлиши мумкинлиги ҳақида кўплаб тахминларни юзага келтирди.

Расмийлар бу тахминни тасдиқлашмади. Паттхиконгпаннинг айтишича, “балиқчилар
бўлак унга ёпишиб кетган чиғаноқларга қараганда сув остида бир йил ётган бўлиши мумкин, деб айтишган”.

Бортида 227 нафар йўловчи ва 12 нафар экипаж аъзоси бўлган Boeing 777-200 самолёти Куала-Лумпурдан Пекинга учиб кетаётганда 2014 йил 8 мартига ўтар кечаси ғойиб бўлган. Самолёт билан алоқа узилгандан кейин унинг кейинги тақдири ҳанузгача номаълумлигича қолмоқда.