ЕИ мамлакатлари Шенген шартномасини икки йилга тўхтатишни таклиф қилди

Еврокенгашга аъзо давлатлар ҳукуматлари Шенген шартномасини икки йилга чеклаш бўйича чоралар қўлланилишини сўрамоқда.

Бу каби чоралар учун қонунчилик базасини тайёрлаш бўйича таклиф Еврокомиссияга тақдим этилган, дея хабар қилди Нидерландиянинг миграция масалалари бўйича вазири Клаас Дийкхоф ЕИга аъзо давлатлардаги ҳамкасблари билан учрашув якунида.

“Аъзо-давлатлар Еврокомиссияга Шенген шартномасининг 26- моддасига биноан қўшимча чегара назорати бўйича вақтинчалик чоралар муддатларини узайтириш учун қонуний ва амалий базани тайёрлашни таклиф қилмоқда”, - деди Дийкхоф.

26- модда Шенген келишуви таъсирини икки йилга чеклаш бўйича чораларни қўллашга имкон беради, дея қўшимча қилди у.

“Айни пайтда чегаралардаги олти ойга чеклов жорий этилган. Бироқ ушбу чораларни қўллашга мажбур қилган қочқинлар оқими қисқарганича йўқ”, - деди Дийкхоф.