ОАВ: Хитойда пўлат ишлаб чиқаришнинг қисқартирилиши 400 минг кишининг ишдан бўшатилишига олиб келади

Хитой ҳукуматининг пўлат ишлаб чиқариш қувватини қисқартириш бўйича режалари пўлат қуювчи корхоналарнинг 400 мингга яқин ходимининг ишдан бўшатилишига олиб келиши мумкин. Бу ҳақда Хитойнинг “Сина” ахборот портали маълум қилди.

Хитойнинг металлургия саноати ривожланишини режалаштириш тадқиқот институти раҳбари Ли Синьчуаннинг фикрича, пўлат қуювчи корхоналарнинг 400 минг ходимидан ташқари, бу соҳа билан боғлиқ қазиб олувчи корхоналар ва охирги маҳсулотни сотувчи компанияларнинг ходимлари ҳам ўз иш ўринларини йўқотишлари мумкин. “Пўлат қуйиш саноатидаги қувватларнинг бундай катта кўламда қисқартирилиши ижтимоий барқарорликка хавф солиши мумкин”, деб айтмоқда Синьчуан.

“Жэньминь жибао” газетасининг маълум қилишича, Хитой ҳукумати яқин орада пўлат ишлаб чиқариш қувватларини 100-150 млн тоннага камайтирмоқчи ҳамда кўмир қазиб олиш қувватларини “анчагина катта кўламда” қисқартирмоқчи.

2015 йилда Хитойда 34 йил ичида биринчи марта пўлат ишлаб чиқариш ҳажми қисқарди. Ўтган йили Хитой 804 млн тонна пўлат ишлаб чиқарди, бу миқдор 2014 йилдагидан 2,3 фоиз камроқни ташкил қилган.

Хитой саноати айни вақтда бир қатор соҳаларда ишлаб чиқаришнинг меъёридан ошиб кетиши ва иқтисодиёт ўсишининг умумий секинлашиши билан боғлиқ муаммоларни бошидан кечирмоқда.