Apple биринчи молиявий чоракда рекорд даражадаги 18,4 млрд доллар даромад олди

Apple компаниясининг биринчи молиявий чоракдаги (2015 йилнинг 26 декабрида якунланди) даромади 18,4 млрд долларни ташкил қилди, бу компания учун рекорд натижа ҳисобланади. Бу ҳақда компания тақдим қилган ҳисоботда айтилмоқда. Компаниянинг шу даврдаги умумий тушуми 75,9 млрд долларни ташкил қилган.

Бундан ташқари, компания iPhone смартфонлари савдоси 1 фоизга ошганини эълон қилди. Янги молиявий йилнинг 1-чорагида бу смартфонлардан 74,7 млн дона сотилган.

Шу билан бирга, Apple прогнозларига кўра, жорий 2-молиявий чорак натижаларига кўра, компания охирги 15 йил ичидаги энг йирик савдолар ҳажми пасайишини бошдан кечириши мумкин.

The Wall Street Journal газетасининг маълумотларига кўра, воқеаларнинг бу каби ривожланиши ўтган йили компания катта диагоналли экранларга эга iPhone смартфонлари янги қаторини тақдим қилгандан кейинги юқори савдолар оқибати бўлади. Янги iPhone’да сезиларли ўзгаришлар йўқлиги сабабли у истеъмолчилар орасида аввалги моделдагидек иштиёқ уйғотмаяпти.

Apple’нинг даромадлари iPhone’лар савдосига кучли боғлиқ, бу смартфонларга компания айланмасининг учдан икки қисми тўғри келади. Компания раҳбари Тим Кукнинг айтишича, компания келгусида iPad планшетларига талабнинг ошиши ва турли хил хизматлар, жумладан мусиқага ихтисослашган Apple Music’дан даромадлар ошишига умид қилмоқда.