Испаниянинг Talgo компанияси Ўзбекистонга сентябрь бошигача иккита юқори тезликда ҳаракатланувчи поезд етказиб беради

Испаниянинг Talgo компанияси томонидан “Ўзбекистон темир йўллари” АЖга иккита юқори тезликда ҳаракатланувчи поездлар етказиб берилишининг дастлабки муддатлари маълум бўлди.

“Ўзбекистон темир йўллари” АЖдаги манбанинг Sputnik мухбирига маълум қилишича, Talgo поездларни 2016 йилнинг сентябригача етказиб беришни якунлашни режалаштирмоқда. Шартномада 4 та бош ва 20 та йўловчи вагонлари ҳамда 2 та вагон-ресторанларнинг сотиб олиниши кўзда тутилган. Бу вагонлардан иккита таркиб шакллантирилади, улардан ҳар бири 287 нафаргача йўловчи таший олади.

Манбанинг айтишича, “Ўзбекистон темир йўллари” поездлар учун 30 фоизлик аванс тўловини ўтказган, испанияликлар эса поездларнинг асосий конструкциясини ясаш бўйича ишларни бошлаб юборишган. Манбанинг таъкидлашича, поездлар муддатидан аввал етказиб берилиши мумкин. чунки испанлар поездлар учун бутловчи қисмларни тайёрлаш учун буюртмани ўзининг бир нечта заводига бериши ҳисобига вақтни тежайди.

Поездларнинг етказиб берилиши бўйича шартнома 2015 йилнинг декабрида имзоланганди. Шартноманинг қиймати расман ошкор этилмаган, бироқ экспертларнинг баҳолашича, унинг қиймати 50 млн доллардан кўпроқни ташкил қилиши мумкин.

Янги поездлар Тошкент-Бухоро юқори тезликдаги линияда ишлатилиши режалаштирилмоқда. Бу линия жорий йилнинг август ойи охирига қадар фойдаланишга киритилади. Линияни қуришнинг умумий қиймати 400 млн доллардан кўпроқни ташкил қилади. Ҳаракатланиш ишга туширилгач, йўловчилар ва юкларни етказиб бериш 2 соатга, эксплуатацион харажатлар 30 фоизга қисқаради.

Ўзбекистонда Talgo компаниясининг 4 та бош ва 18 та йўловчи вагонидан иборат иккита таркибдан 5 йилдан бери фойдаланилмоқда. Улар Ўзбекистон ҳудудида мавжуд бўлган қадимий шаҳар шарафига “Афросиёб” деб аталган ва Тошкент-Қарши йўналиши бўйича йўловчиларга хизмат кўрсатади. Айни пайтгача бу поездларда 750 мингдан кўпроқ йўловчи ташилган.