Оқ уй олдида 30 йилдан ортиқ вақт давомида петициялар уюштириб келган аёл вафот этди

30 йилдан ошиқроқ вақт мобайнида Оқ уй олдида тинчлик ядровий қуролларга қарши курашиб петициялар уюштирган аёл вафот этди.

Washington Post берган маълумотга кўра, Концепсион Пиччотто душанба куни Вашингтондаги овлоқ жойларнинг бирида вафот этган. Ўлимнинг сабаби ва аёлнинг ёши борасида аниқ маълумотлар йўқ. У тахминан 80 ёшлар атрофида бўлгани айтилмоқда.

Аёл 1960 йилда Испаниядан АҚШга муҳожир сифатида келиб қолган. Аввалига у Испания элчихонасида ишлаган ва итальян йигитига турмушга чиққан, ундан икки нафар қиз фарзанд кўрган. Уларнинг ноқонуний равишда асраб олган ўғил фарзандини эса эри ажрашгач ўзи билан олиб кетган.

Аёл 1981 йилдан бошлаб у икки нафар шериги билан тинчлик учун курашувчи ҳаракат гуруҳига қўшилган. Бироқ улар ташкил этган петициялар бирор марта ҳам конгрессда муҳокама мавзусига айланмаган.

Полиция ва Оқ уй хавфсизлик хизмати унинг норозиликларига халақит беришмаган. Бироқ қонунчиликка биноан пикетларга эътиборсиз қараб бўлмаслиги боис улар ҳушёр кузатиб борилган.

Бу вақт ичида Пиччотто (уни танишлари «Конни» ёки «Кончита» деб аташган) Вашингтоннинг рамзларидан бирига айланди. Унинг қўлидаги ёзув туширилган плакат анча машҳур бўлган ва сайёҳлар тез-тез уни суратга олиб кетишган. У шунингдек «Фаренгейт 9/11» ва «Оракула Пенсильвания авенюси» ҳужжатли фильмларида ҳам кўриниш берган. Кончитанинг ўзи миссияси ҳақида ҳар доим бир гапни такрорлаган: «Мен шу ерда бўлишим керак. Бу – менинг ҳаётим».