Португалиядаги ўнлаб жамоалар таркибига хитойлик футболчиларни жалб этиш шарт қилиб қўйилди

Португалияликлар иккинчи лигани Хитойда маиший техника буюмлари ишлаб чиқариш билан шуғулланадиган Ledman компаниясига "сотишди". Компаниянинг расмий сайтида маълум қилинишича, Ledman кейинги мавсумда Португалиянинг иккинчи дивизиони бош ҳомийси бўлади.

Бу бўйича келишув 25 январь куни Пекинда компания раҳбарияти ҳамда собиқ ҳакам, Португалия профессионал лигасининг амалдаги раҳбари Педро Проенса иштирокида тузилган. Турнирнинг номи Ledman Proliga қилиб ўзгартирилиши белгиланган.

Келишув шартига кўра, иккинчи дивизионнинг ўнлаб жамоалари кейинги мавсумда ўз таркибига камида бир нафардан хитойлик футболчини қўшиб олиши керак бўлади. Бундан мақсад - Хитой футболи ривожига ҳисса қўшиш ҳисобланади.

Бундан ташқари, Ledman Португалияга уч нафар мутахассисни лигадаги жамоаларнинг бош мураббийларига ёрдамчилик қилиш ва малака ошириш учун жўнатади.

Шартноманинг молиявий жиҳатлари аён қилинмаган. Қайд этиш керакки, хитойлик тадбиркорлар бундай ишларни кейинги вақтларда кўпроқ амалга оширишмоқда. Бундан олдинроқ, ушбу маҳаллий компания ички биринчиликнинг бош ҳомийсига айланганди.